19 июня 2026
Бонки Имон Интернешнл дар XII Намоишгоҳи байналмилалии тиҷоратӣ ва сармоягузории «Суғд-2026», ки рӯзҳои 18–19 июн дар шаҳри Хуҷанд баргузор гардид, иштирок намуд. Дар ин чорабинӣ намояндагони соҳибкорӣ, муассисаҳои молиявӣ, сохторҳои давлатӣ ва созмонҳои байналмилалӣ аз зиёда аз 20 кишвари ҷаҳон ширкат варзиданд.
Намоишгоҳи «Суғд-2026» ба як майдони муҳими баррасии иқтидори сармоягузории минтақа, рушди ҳамкориҳои байналмилалӣ, барқарор намудани робитаҳои нави тиҷоратӣ ва муаррифии лоиҳаҳои дурнамодор дар бахшҳои гуногуни иқтисодиёт табдил ёфт.
Дар доираи чорабинӣ Бонки Имон Интернешнл гӯшаи намоишии худро муаррифӣ намуд, ки дар тӯли ду рӯзи намоишгоҳ садҳо меҳмонон аз он боздид карданд. Намояндагони бонк ба меҳмонон оид ба хизматрасониҳои бонкӣ, маблағгузории соҳибкорӣ, барномаҳои қарзӣ, интиқолҳои байналмилалии маблағ, маҳсулоти амонатӣ ва хизматрасониҳои муосири рақамӣ машварат пешниҳод намуданд.
Ҳалли рақамии бонк, ки ба баланд бардоштани дастрасии хизматрасониҳои молиявӣ барои аҳолӣ ва соҳибкорон равона шудаанд, таваҷҷуҳи махсуси иштирокчиёнро ҷалб карданд. Меҳмонон бо имкониятҳои замимаи мобилии Imonline, амонати онлайн ва дигар хизматрасониҳои муосир шинос шуданд, ки дастрасии зуд ва қулай ба хизматрасониҳои бонкиро фароҳам меоранд.
Иштирок дар намоишгоҳ ҳамчунин имконият фароҳам овард, то мулоқотҳои корӣ бо намояндагони соҳибкорӣ, шарикони эҳтимолӣ ва сармоягузорон баргузор карда шаванд. Дар ҷараёни вохӯриҳо дурнамои ҳамкориҳои минбаъда, дастгирии соҳибкорӣ ва татбиқи лоиҳаҳои нав, ки ба рушди иқтисодиёти кишвар мусоидат мекунанд, мавриди баррасӣ қарор гирифтанд.
Имрӯз Бонки Имон Интернешнл фаъолияти худро пайваста рушд дода, технологияҳои муосири рақамиро бо сатҳи баланди хизматрасонӣ ба мизоҷон ва дастгирии соҳибкорӣ муттаҳид менамояд. Иштирок дар чунин чорабиниҳои бузург ба бонк имкон медиҳад, ки ҳамкориҳои мавҷударо таҳким бахшида, имкониятҳои нави рушдро пайдо намояд ва ба мизоҷон ва ҷомеаи соҳибкорон боз ҳам наздиктар бошад.
Бонки Имон Интернешнл ба созмондиҳандагони намоишгоҳи «Суғд-2026» барои фароҳам овардани фазои муассири муколама, мубодилаи таҷриба ва рушди ҳамкориҳои тиҷоратӣ изҳори сипос намуда, омодагии худро ҷиҳати идома додани саҳмгузорӣ дар рушди бахши молиявӣ ва иқтисоди Ҷумҳурии Тоҷикистон бори дигар таъкид менамояд.
